Mesudi Dovran - Wikipedia - Love.az

Məsud Əliağa oğlu Məmmədov 27 iyul 1937-ci ildə Astara rayonunun Şahağac kəndində anadan olmuşdur.^[2] 1954-cü ildə Astara rayonunun Şiyəkəran kənd orta məktəbini bitirmiş və 1958-ci ilə qədər Şahağac kənd məktəbində "Pioner baş dəstə rəhbəri" vəzifəsində çalışmışdır. 1958–1962-ci illərdə ordu sıralarında xidmət etmişdir. 1962–1967-ci illərdə M. F. Axundov adına Azərbaycan Pedoqoji Dillər İnistitutunun "Rus dili və ədəbiyyatı" fakültəsində təhsil almış və inistitutu bitirdikdən sonra AMEA-nın Nəsimi adına Dilçilik İnistitutunun "İran və Qafqaz" dilləri şöbəsində kiçik elmi işçi vəzifəsini daşımışdır.

Məsud Əliağa oğlu Məmmədov 1973-cü ildə elm aləminə məlum olmayan "Xələc dili" mövzusunda namizədlik dissertasiyasını müdafiə etmişdir.

1975–1994-cü illərdə Özbəkistan Respublikasının Gülüstan Dövlət Universitetində baş müəllim vəzifəsində fəaliyyətə başlayan Məsud Əliağa oğlu Məmmədov sonralar "Rus dili" kafedrasının müdiri, "Rus dili və Ədəbiyyatı" fakültəsinin dekanı və artıq 1987–1992-ci illərdə Tədris işləri üzrə prorektor vəzifəsinə qədər yüksəlmişdir. O, 1984-cü ildə doktorluq dissertasitasını müdafiə etmişdir. 1985-ci ildən professordur.

Məsud Əliağa oğlu Məmmədov 1992–1994-cü illərdə Qazaxıstanın Çimkənd vilayətinin Türkistan şəhərində təşkil olunmuş Türk–Qazax Beynəlxalq Universitetinə dəvət olunmuş və "Türk dili"kafedrasının müdiri vəzifəsində çalışmışdır.

O, 1994-cü ildən Lənkəran Dövlət Universitetində çalışır. 300-ə yaxın elmi məqalə, 5 monoqrafiya, 6 şeirlər kitabının müəllifidir.

O bir neçə dil bilir və rus, özbək, talış və doğma dilində şeirlər yazır.

Məsudi Dövran ailəlidir, iki oğlu, bir qızı, 6 nəvəsi var. Milliyətcə Azərbaycanlı — Qacar nəslindəndir.

• Həsrət — 1996,
• Belə dünyadır bu dünya — 1999,
• Yetim dünya — 2000,
• Ömürdən bir damla — 2003,
• Az tolışim (talış dilində) — 2004,
• Tyrandan ovoz (özbək dilində) — Taşkent "ZİE" 1994.
• "Azərbaycanın Lənkəran zonasının toponimləri", "Elm və təhsil", 2021.^[3]