Sunny Yorushika Mahnisi - Wikipedia - Love.az

22 dekabr 2023-cü ildə "Frieren" animesinin 16-cı seriyası – "Uzunömürlü dostlar" yayımlandıqdan sonra animenin dördüncü treylerində "Sunny" mahnısından bir parça daxil edilmişdir. Beləliklə, "Yorushika" qrupu tərəfindən animenin ikinci açılış mahnısının ifa olunacağı məlum olmuşdur.^[2] Mahnı rəqəmsal formatda 5 yanvar 2024-cü ildə – animenin 17-ci seriyası "Özünüzə yaxşı baxın" ilə eyni vaxtda buraxılmışdır.^[3]

"Yorushika" qrupunun üzvü və mahnı yazarı N-buna müsahibəsində bildirmişdir ki, "Sunny" mahnısı "günəşli olmayan havalarda günəşli günlər üçün ümid etmək" haqqında bir mahnıdır.^[4] "Real Sound" tənqidçisi Ryohey Ohara qeyd etmişdir ki, "Sunny" animenin birinci açılış mahnısı olan "Yūsha" mahnısına nəzərən daha abstraktdır, lakin "animeyə daha çox uyğun gəlir".^[5] Eyni saytdan Erio İşii mahnının "sadəcə hekayəni nəql etmədiyini, həm də dinləyiciyə güclü mesaj ötürdüyünü" qeyd etmişdir.^[6]

Mahnı üçün animasiyalı musiqi videosu 5 mart 2024-cü ildə buraxılmışdır. Videonun rejissoru Kota Moriedir. O, daha öncə qrupun bir neçə musiqi videosu üzərində işləmişdir.^[7] Videonun mahnı ilə eyni vaxtda buraxılması planlaşdırılsa da, "Yorushika" qrupu keyfiyyəti qorumaq üçün iki ay sonra buraxılmasını istəmişdir.^[8] Haruki Murakaminin 1985-ci ildə nəşr olunmuş "Bərk bişmiş möcüzələr ölkəsi və dünyanın sonu" romanından təsirlənən video keçilməz divarlarla əhatə olunan qəsəbədə yaşayan uşaq və atasının hekayəsinin bəhs edir.^[9] "Frieren" animesindən səhnələrin yer aldığı xüsusi musiqi videosu 29 martda buraxılmışdır.^[10]