Vikipediya Secilmis Meqale Sertleri - Wikipedia - Love.az

• VP:SMŞVP:SMŞ

Bu səhifə Vikipediyanın rəsmi prinsiplərindən biridir. Səhifənin məzmunu bütün vikipediyaçılar tərəfindən eyni dərəcədə riayət edilməsi tələb olunan qaydalardan ibarətdir. Səhifədə redaktə etmədən öncə bu dəyişikliklərin vikipediyaçılar tərəfindən dəstəkləndiyindən əmin olun. Düzgün hesab etmədiyiniz məqam varsa, səhifənin müzakirə səhifəsində bunu aydın şəkildə ifadə edin.

Qayda səsvermə nəticəsində qəbul edilmişdir.

• Səsvermə müddəti: 31 oktyabr 2015 — 15 noyabr 2015.
• Qüvvədədir: 16 noyabr 2015-ci ildən.

Seçilmiş məqalə Vikipediyanın ən yaxşı məqalələrinə verilən statusdur. Seçilmiş məqalənin üst sağ küncündə qızılı rəngdə kiçik ulduz nişanı qoyulur.

Məqalənin seçilmiş məqalə statusu qazanması üçün o, yaxşı yazılmış, əhatəli, doğru, tərəfsiz və etibarlı olmalıdır.

Yəni:

1. Yaxşı yazılmış – məqalənin mətni aydın tərzdə və Azərbaycan dilinin bütün qanunlarına cavab verəcək şəkildə olmalıdır.
2. Müfəssəl – məqalə mövzu ilə əlaqədar dəqiq mənbələrə əsaslanan əhəmiyyətli məlumatlarla zəngin olmalıdır.
3. Doğru – məqalədə iddia edilənlər etibarlı mənbələrdə öz təsdiqini tapmalıdır. Əks iddialar məntiqi dəlillərlə irəli sürülməli və alternativ etibarlı mənbələrlə təsdiq olunmalıdır.
4. Tərəfsiz – məqalə mövzu ətrafındakı bütün fikirləri özündə əks etdirməli və neytral mövqedən yazılmalıdır.
5. Etibarlı – məqalə davamlı dəyişikliklərə məruz qalmamalıdır. Vandalizm səciyyəli redaktələrin ləğvi və məqalənin zənginləşdirilməsi məqsədi ilə edilən dəyişikliklər istisnadır.

Həmçinin məqalə aşağıdakılarla təmin olunmalıdır:

1. Giriş hissə – bütün mövzunu əhatə edən, oxucunu qarşısına çıxacaq vacib məlumatlarla təmin edən giriş hissə olmalıdır.
2. Mündəricat – məqalədə düzgün başlıqlar olmalıdır.
3. Kateqoriya və şablonlar – məqalə uyğun gələn bütün kateqoriyalara əlavə olunmalı, yoxdursa, kateqoriyalar yaradılmalıdır. Həmçinin məqaləyə uyğun, naviqasiya şablonları və infoqutu əlavə olunmalıdır. Ehtiyac olduğu halda digər şablonlar da əlavə olunmalıdır.

Media: Məqalə şəkillərdə və ehtiyac olduğu halda digər fayllarla təmin olunmalıdır. Məqalədə azad fayllar üstünlük təşkil etməlidir.

Ölçü: Lazımsız məlumatlar əlavə etməklə həddən artıq uzun və ya çox qısa olmamalıdır.

Aşağıdakı hallarda məqalə seçilmiş məqalə namizədi ola bilməz:

• Məqalə üzərində qızğın mübahisələr gedirsə;
• Məqalədə müəllif hüquqlarını pozan materiallar varsa.